BELLANAPOLI

Cerca

Vai ai contenuti

Luciano Somma

POESIE

TORNA ALL'INDICE



Doce e amaro


Nun me dicere niente
'e vvote è ciento mille vote meglio
restà dint''o silenzio
pe' sentì tutt''e palpite d''o core
'o scorrere d''o sango dint''e vvene
l'amaro e 'o ddoce tremmulio d''o bbene .
Lassale sti parole
scritte 'ncopp'a na paggina d''o tiempo
ca c'è nemico , e tu sai quanto e comme ,
nun me chiammà pe' nomme .
Mo ca tra nuje ,
ce ne stammo accurgenno ,
juorno pe' ghiuorno ,
è addeventata cennere
l'estate
e fa paura
'a maschera 'e ll'autunno !



'Nu bbene scurdato

N'ata nuttata è fernuta !
Senza 'o cunforto 'e nu bbene ,
senza 'o sullievo d''o suonno ,
e nasce , cu' n'alba 'nziriosa ,
c''o primmo suspiro d''o sole ,
'o juorno cu''a croce d''o juorno !
Ma dint''a ferita 'e nu vico :
na rosa , 'int''e spine d''o vascio ,
schiuppata , cu' l'uocchie assunnate ,
nu musso 'e curallo pe' vvocca !
A ppietto nu ninno che zuca...
Nu giovane passa e s''a guarda
e 'o rrusso d''o scuorno s'appiccia
'ncop''a faccella e' pupata .
E io tengo mente speruto...
Me piace sta femmena bella ,
me piace stu ninno ca zuca ,
supporto sta croce d''o juorno .
Sarrà ca nun tengo a nisciuno ,
sarrà ca nun aggio durmuto ,
sarrà chistu sole d'autunno ,
sarrà p''o calore perduto ,
nu squarcio 'int'all'ombra nemica
c'appiccia 'int''o core 'a speranza
me pare cchiù nova sta luce
ca schiara stu scuro d''a stanza .
E tornano comme a palomme
penziere d'ammore vasate
e io torno a sunnà , senza suonno ,
'o sciato 'e nu bbene scurdato....




L'artista

So' turnato ccà 'ncopp' 'e quartiere
ce mancavo , nun saccio 'a quant'anne ,
vola 'o tiempo , Giesù pare aiere ,
quanta facce sparute so' 'a tanno .
Quanta cose se songhe cagnate
comme pure è cagnata sta ggente
guarda annanze , luntano è 'o passato ,
nun è cchiù abbandunata e pezzente .
Chi me vede 'e passà , furastiero ,
comme fosse , chisà , nu turista ,
nun 'o ssape io na vota chi ero
me chiammavano allora : L'artista !
Si , n'artista , che jevo p' 'e viche
miez' 'o tanfo 'e sudore e cu' 'a famma
quanno Dio me pareva nemico
e 'a Madonna matrigna e maje mamma .
Quanno arraggia appannava chist'uocchie
'o destino pareva fetente
me sentevo tremmà 'int' 'e ddenocchie
e cantavo...cantavo...pe' niente .
Faccio parte pur'io 'e chistu vico
ma ogge songo sultanto " turista "
chi me sape , m'apprezza e m'è amico
e pirciò nun s''o scorda l'artista .

da "
CRISTO NAPULITANO"
Ed.I MIEI COLORI - Pontassieve(Firenze)
Settembre 2000




Lacrime 'e luna

C''o primmo suspiro d''a sera
te scite ricordo luntano
e ''nnanze a chist'uocchie accumpare
na faccia , na vocca , na mano .


E' autunno e sta rena ch'è 'nfosa ,
p''e lacreme doce d''a luna ,
cu' ll'onne d''o mare se sposa
e tu nun ce staje , che sfurtuna .


Cà a Ischia nu juorno d'estate
nascette pe' nuje chill'ammore
e po' quante e quante nuttate
passate cu' tte core a ccore .


Mo chiove e sti lacrime 'e luna
ca 'nfonneno 'e strade vacante
dint'a chist'uocchie una a una
se 'mpizzano e appicciano 'o chianto .


Te cerco pe' miez''a pineta
addò 'nfaccia a n'albero antico
saziaste l'arsura 'e sta sete
facenno l'ammore cu' mmico .


E guardo 'ncantato 'o castiello
addò 'ncop''o ponte nu juorno
a mme t'astrigniste felice
cu''a faccia arrussata p''o scuorno .


Attuorno è deserto ma Ischia
'a tengo 'int''o sanghe , 'int''e vvene
e allora ce resto aspettanno
dimane chisà n'atu bbene .


Cchiù forte 'e sti lacrime 'e luna
cchiù forte d''a forza d''o mare
'a sento vicino 'a furtuna ,
speranza è na luce 'e lampara...






P''e stade d''o cielo

A che servono , oramaje , 'sti pparole ,
a che serve suffrì inutilmente...
quanno ' o ssaccio sicuro , m''o ssento
ca tu si' felice accussì .
Ma che vuò forse 'nfunn'a stu core
quacche cosa d'allora è rimasto :
forse 'ammore o ll'arraggia , nun saccio ,
saccio sulo ca moro pe' tte !
E penzanno ca 'o viento te vasa ,
e ca 'o sole 'a matina te sceta ,
ca tu parle 'e bbene cu' n'ato ,
io me sento sta vita 'e fernì .
Si m'addormo te veco 'int''o suonno ;
si me sceto te chiammo pe' nomme ;
si cammino te veco fra 'a ggente ...
Che turmiento è stu bbene , Marì .
E m'acquieto surtanto si penzo
che sta vita è na cosa 'e passaggio ;
ca nu juorno p''e strade d''o cielo
forse, ammore , io te pozzo 'ncuntrà !

Luciano Somma - 1968








VICO NAPULITANO

E' sarracena sta strada 'nfosa;
'na fila e' vascie , nu vico chiuso ,
so' goccie 'e chianto sti panne spase ,
na stanza pare ch'è nu pertuso .
Fenesta vascia cu' na Maria ,
ca me faceva sunnà l'ammore ,
t'hanno 'nzerrata cu' na buscia
d'' o terramoto ch'è senza core .
Chesta canzone , canzone amara ,
porta 'int''e nnote cchiù 'e nu dulore
quanno se perde na cosa cara
se po' ascì pazzo , ce stà chi more !
Na mana sfila 'int''a sacca onesta
na vocca strilla 'nfaccia 'e prumesse
è sulo 'arraggia chella ca resta ,
quanno nu popolo è cuoppo allesse .
'O vico ajere nun era " Santo "
si l'attuccava te deva 'a mano
ce steve 'a risa , ce steve 'o chianto ,
era nu vico Napulitano .

1992

Home Page | STORIA | FOTO | CAROSONE | TUTTONAPOLI | CANZONI | CONTATTACI | PERCHÈ | DETTI | Mappa del sito


Torna ai contenuti | Torna al menu