BELLANAPOLI

TORNA ALL'INDICE





Rebus


Che canta a ffa' st' auciello 'int' a cajola
si canta sulo ma nun po' vula'?
'Sta voce sulitaria, sola sola,
nun è nu canto senza libertà!


E j' cu' 'e vierze mieie che canto a ffa'
si 'e sbarre attuorno 'o core tu m' hê miso?
J' canto, forze, pe' pute' sunna'
ca chist' inferno è tutto paraviso!?!


(Giulio Mendozza, Stelle 'mpazzute, Volpicelli, Napoli)








'A Margherita


'A meglia pizza 'e Napule
se chiamma margherita,
amata e riverita
'a tutta 'sta città.


'A mozzarella càvera
fremme 'ncopp'a 'sta pizza,
'o trùcelo s'attizza
e ll'uoglio fa avvampa'.


Zompa pe' copp' 'a pasta
'stu rrusso 'e pummarola
'nziem'a' vasenicola
pe' tè fa' arrecrià.


Appen'iesce d' 'o furno
pare che sta cantanno,
se move, sta abballanno,
senzosa comm'a cche...


Nu quadrone 'e Michelangelo,
nu schizzo 'e Raffaello
nunn'è ca po' è cchiù bello
nnanz'a 'sta rarità.


Chella è natura morta,
chesta è natura viva,
mentre 'o prufumo arriva
'o naso a stupetia'...


Magnatavélla 'a pizza
cu 'o schiopp' 'e birra 'a coppa,
po' me dicite 'aroppa;
'e meglio che ce sta?



(Giulio Mendozza, Curtellate 'e sole, Ferraro, Napoli)