BELLANAPOLI

TORNA ALL'INDICE


Poesia 1


No,
nun ‘o tengo
‘o sango dint’’e vvene:
‘ncuorpo me scorre
l’acqua ‘e mare.
Nun tengo
core ‘mpietto,
ma ‘nu scoglio
addo’ l’alga
ha truvato
‘n appiglio,
addo’ ‘e sirene
se vanno a pusa’.
E ‘nfaccia a ‘stu scoglio
forte ce sbattono
ll’onne.


11.11.1999




Poesia 2


E io tenevo 'na vocia.
No 'na vocia putente e lirica,
ma 'na vocia sufficiente
pe' pute' canta'
'e canzone ca piacevano
a me.
M'abbastava chella vocia,
che, cu 'a chitarra mia,
'a sera,
'nchiuso dinto 'a stanza,
'ncopp' 'o lietto,
cantava canzone allere
e appassiunate.
'A tengo ancora 'a chitarra
c'accumpagnava chella vocia
ca era sufficiente
pe' pute' canta'
'e canzone ca piacevano
a me.



24.03.1987